Archwiliad o Amgueddfeydd sy’n Croesawu Teuluoedd i Amgueddfeydd yng Nghymru

Mae Kids in Museums yn gwahodd amgueddfeydd yng Nghymru i wneud cais am Archwiliad wedi ei ariannu’n llawn o Amgueddfeydd sy’n Croesawu Teuluoedd, tair awr o fentora gydag un o’n hymgynghorwyr profiadol a grant o £500 i roi gwelliannau ar waith yn eich darpariaeth i deuluoedd. Cefnogir hyn yn hael gan Lywodraeth Cymru.

Mae hyd at bedwar archwiliad ar gael. Gallwn wneud yr archwiliadau a’r mentora drwy gyfrwng y Gymraeg neu’r Saesneg a bydd angen defnyddio’r amser mentora a’r grant erbyn diwedd Chwefror 2025.

Gair am Archwiliadau Kids in Museum o Amgueddfeydd sy’n Croesawu Teuluoedd, mentora a chyllid

Mae Archwiliad gan Kids in Museums o Amgueddfeydd sy’n Croesawu Teuluoedd yn gyfrwng syml, ymarferol a chost-effeithiol i wneud eich amgueddfa’n fwy croesawgar i blant a theuluoedd.

Mae’r archwiliad wedi ei seilio ar Faniffesto Kids in Museums, un o’n mentrau mwyaf pwerus a hirsefydlog. Mae’r Maniffesto wedi ei seilio’n gyfan gwbl ar adborth gan deuluoedd, plant a phobl ifanc am eu profiadau o ymweld ag amgueddfeydd.

“Cofrestrais ar gyfer yr archwiliad gan obeithio cael ychydig bach o adborth am yr amgueddfa a, gobeithio, ychydig o arian i greu gweithgaredd neu ddau. Yr hyn a gefais oedd gwell dealltwriaeth o’r ffordd y mae teuluoedd yn defnyddio amgueddfeydd, beth maen nhw’n hoffi ei weld mewn amgueddfeydd, a rhai syniadau gwych am newidiadau hawdd a fydd yn gwneud gwahaniaeth mawr. Mae wedi bod yn brofiad gwych a byddwn yn ei argymell yn fawr i unrhyw amgueddfa neu safle.” Hollie Gaze, Swyddog Gwasanaethau Ymwelwyr yn Amgueddfa Abertawe

Bydd Archwiliad o Amgueddfeydd sy’n Croesawu Teuluoedd yn gwerthuso ymweliad â’ch amgueddfa yn erbyn chwe phwynt y Maniffesto er mwyn canfod pa mor effeithiol yw eich croeso i blant a theuluoedd. Mae ymgynghorydd profiadol o Kids in Museums yn arolygu popeth, o’r caffi a’r ddesg docynnau, i’ch dehongliadau, gofodau neu arddangosiadau ar gyfer plant a theuluoedd.

Yn dilyn yr ymweliad, bydd yr ymgynghorydd yn cynhyrchu adroddiad darluniadol sy’n dangos y meysydd o arfer da ar hyn o bryd ac yn cynnwys cynllun gweithredu cost effeithiol syml am y meysydd i’w gwella. Yn ogystal â chynnig canllaw ymarferol i wneud eich amgueddfa’n fwy croesawgar i deuluoedd, bydd yr adroddiad yn gyfrwng eirioli pwerus ar gyfer cynnwys plant a theuluoedd ar draws eich sefydliad.

Unwaith y bydd yr adroddiad wedi ei gyflawni, bydd gan bob amgueddfa hyd at dair awr o amser mentora gyda’r ymgynghorydd a wnaeth yr archwiliad. Bydd modd defnyddio’r amser hwn mewn cytundeb â’r mentor rhwng Medi 2024 a Chwefror 2025.

Bydd pob amgueddfa’n derbyn £500 o arian grant i wneud gwelliannau i’w darpariaeth i deuluoedd ar sail yr archwiliad a’r mentora. Gallwch ddefnyddio hwn i brynu deunyddiau, offer neu adnoddau a bydd angen ei wario erbyn Chwefror 2025.

Mae’r rhaglen hon wedi ei hariannu’n hael gan Lywodraeth Cymru.

Llinell Amser

• Bydd yr Archwiliad o Amgueddfeydd sy’n Croesawu Teuluoedd yn digwydd rhwng Gorffennaf a Medi 2024
• Daw’r adroddiad terfynol erbyn mis Hydref 2024
• Tair awr o amser mentora gyda’r ymgynghorydd y mae’n rhaid eu defnyddio erbyn Chwefror 2025
• £500 o gyllid i gael ei wario erbyn Chwefror 2025.

Yr Amodau ar gyfer Cymryd Rhan

Rhaid i’r amgueddfeydd fod yng Nghymru. Nid yw’r amgueddfeydd oedd yn rhan o Archwiliadau Amgueddfeudd sy’n Croesawu Teuluoedd wedi eu hariannu gan Lywodraeth Cymru yn 2021, 2022 a 2023 yn gymwys i wneud cais yn 2024. Os oes gan eich amgueddfa fwy nag un safle, dim ond un safle y gallwn ei archwilio fel arfer.

Rhaid i amgueddfeydd ymrwymo i:

• ddarparu person cyswllt penodol ar gyfer y prosiect
• gymryd rhan yn weithredol yn y prosiect, yn cynnwys cysylltu’n amserol a phrydlon gyda phartneriaid y prosiect, a chael caniatâd a chymorth eu huwch dîm rheoli.
• gymryd rhan mewn gwerthusiad o’r prosiect.

Gwneud cais

Mae’r broses ymgeisio ar agor yn awr.

I wneud cais am Archwiliad o Amgueddfeydd sy’n Croesawu Teuluoedd, lawrlwythwch a llenwch ein Ffurflen Gais (lawrlwytho Dogfen Word) a chadarnhau eich bod yn deall y gofynion cymhwysedd ar gyfer derbyn archwiliad.

Dylech anfon y ffurflenni cyflawn atom ar e-bost erbyn 5pm Dydd Mawrth 4 Mehefin 2024 fan bellaf: [email protected]

Byddwn yn cysylltu â’r ymgeiswyr i gyd i roi gwybod iddynt am ganlyniad eu cais erbyn diwedd y diwrnod Ddydd Gwener 21 Mehefin 2024.

Os oes gennych unrhyw gwestiynau am gymryd rhan, anfonwch e-bost atom ar: [email protected]